АНУ-ын ерөнхийлөгч Барак Обама Копенгагенд болсон НҮБ-ын чуулга уулзалтаас эргэж ирээд "Andrews" нисэх баазад газардан, цас их орж байгаагаас Цагаан ордон руу машинаар явжээ. Уг нь тэрбээр гэр рүүгээ нисдэг тэргээр харих ёстой аж.

Ерөнхийлөгчийн онгоцыг газардахын хүлээн нисэх баазын ажилтнууд хэдэн минут болоод л онгоц буух талбайн цасыг цэвэрлэж байжээ.

АНУ-ын ерөнхийлөгчийн онгоц зөвхөн Andrews баазад бууж, хөөрдөг. Вашингтоноос машинаар 30-40 минут явах нисэх баазад ерөнхийлөгч нисдэг тэргээр л ирж очдог журамтай аж. Цагаан ордноос нисдэг тэргээр 15 минут нисээд Andrews баазад ирдэг. Энэ нь ерөнхийлөгчийг явах үед замын хөдөлгөөн хаах, хотын амьдралын хэмийг алдагдуулахгүй ач холбогдолтой юм.

Харин бямба гаригт цас их орж байгаагаас Нууц албаныхан ийм нислэг үйлдэхийг зөвшөөрөөгүй учир Обама гэр рүүгээ машинаар явахаас өөр аргагүй болжээ. Энэ үеэр замын хөдөлгөөн хааж боосон эсэх талаар мэдээлэл байхгүй байна.