"Өнгөрсөн долоон сарын турш явуулсан эрдэм шинжилгээ, судалгааны суурь болон эмчилгээний туршилтын үр дүнд А хүрээний H1N1 вирүст ханиадыг анагаах шинэ эмийг Хятад улсад гаргав" гэж Бээжин хотын захиргаанаас мэдээллээ.

Энэ оны зургадугаар сард Бээжин хотын захиргаа 10 сая юаны хөрөнгө гаргаж, хятад эм, анагаах ухааны судлаач, эрдэмтэн, нарийн мэргэжлийн эрдэм шинжилгээний 120 ажилтныг оролцуулан, вирүст ханиадыг эмчлэх, судалгааны маш хүчтэй баг ажиллуулсан байна. Судалгааны баг олон улсын хэмжээнд нийтлэг ашигладаг эрдэм шинжилгээний аргачлалын дагуу Хятад улсын хятад эмийн эрдэм шинжилгээний хүрээлэн, Хятад улсын анагаах ухааны их сургуулийн хятад эм судлалын лаборатори, Аж үйлдвэрийн их сургууль гэсэн эрдэм шинжилгээний гурван газарт туулай, хулгана зэрэг амьтан дээр суурь судалгаа хийж, туршсан байна.

Бээжин хотын Чаоян, Дитань зэрэг дөрвөн эмнэлэгт ханиадаар өвчлөгсдөд маш нарийн дэг журмын дагуу эмчилгээний туршилт хийж, биеийн халууныг бууруулах, амьсгалын замын өвчин эдгэрэлтэд маш сайн үр дүнтэйг нотолсноос гадна хэрэглэсэн хүмүүст ямар нэгэн харшилгүй болохыг тогтоосон байна.

Бээжин хотын "Чао ян эмнэлгийн дарга Ван Чэний мэдэгдсэнээр, энэ эмний үнэ дэлхийн орнуудад шинэ ханиадыг анагаахад хэрэглэж буй "Тамифлю" эмнээс дөрөв дахин хямд юм.

Ж.Ариунболд