33 дугаар сургуулийн дөрөвдүгээр ангийн сурагч Б.Нэмүүцэцэг охин цаасан дээр буулгасан шүлэг, өгүүллэгээ эмхэтгэн анхны номоо өлгийдөн авчээ.

Бяцхан яруу найрагч охин “Хэний ч мэдэхгүй ордон” номоо хамгаас хайртай өвөө Ш.Дамдиндоржийнхоо гэгээн дурсгалд зориулан гаргажээ. Түүний анхны номонд эх орон, үерхэл нөхөрлөл, шинэ жил, хүүхэд нас гээд 79 өгүүллэг шүлэг орсон гээд бодохоор мундаг яруу найрагч болох нь ээ. Түүний уран бүтээлийн цоморлогоос нь сонирхуулъя.

Хүүхэлдэйн кино
Би чамд хайртай гэж хэлэх агшнаар зүрх минь догдолдог
Хайртай хүнээ тэврэх зүүдээр сэтгэл минь тайвширдаг
Харамсалтай нь тэр намайг ойлгодоггүй
Би чамд ойлгуулахыг хүснэ
Хүүхэлдэйн кино минь

2008.03.15

Тайван бай
Онц сур гэж битгий зэмлэ
Тайван бай аав минь
Охин нь онц сурна
Гоё бич гэж битгий зэмлэ
Тайван бай ээж минь
Охин нь гоё бичнэ
Та хоёр даалгавар хий гэж битгий зэмлэ
Тайван байцгаа
Охин нь том болсон шүү дээ

2008.12.16

Аавдаа
Аав минь охиныхоо гэрэлт саран нь юм
Аав минь охиныхоо тэнгэрт гялалзах эрхэмсэг мөрөөдөл нь юм
Аав минь охиныхоо хөрст дэлхийн нар нь юм
Аав минь охиныхоо зөн билгийн сахиус нь юм

2009.09.26