Энэ сарын 16-нд улаан кхмерүүдийн үзэл санааны гол номлогч гэгддэг Нуон Чеа болон Гадаад хэргийн сайд асан Иенг Сари нарыг мөн энэ хэрэгт буруутай гэж үзсэн юм.
Үүнээс өмнө Пномпень дахь Туолслеиг шоронг толгойлж байсан "Дуч" нэрээрээ алдартай КангКек Ие шүүхээр орж, багаар бодоход 15 мянган хоригдлын үхэлд буруутай болох нь тогтоогдсон. Түүнийг хүн төрөлхтний эсрэг гэмт хэрэг үйлдсэн, Женевийн конвенцийг зөрчсөн, санаатайгаар хүний амь хөнөөсөн, тамлан зовоосон гэсэн зүйл ангиар ял оноох болно.
Далаад оны үед Камбожид алан хядах дэглэм тогтоож байсан улаан кхмерүүдийн удирдагчдыг шүүх хурал энэ оны хоёрдугаар сараас эхэлсэн.
Зургаан жил яриа хэлэлцээр хийсний эцэст 2003 оны зургадугаар сард НҮБ-ын Ерөнхий ассамблей Камбожийн шүүхийн системийн хүрээнд "Шүүхийн онцгой танхим" байгуулах шийдвэрийг сайшаасан. Энэхүү танхим нь улаан кхмреүүдийн хэргийг мөрдөн шалгаж, ял оноох ёстой юм. Бүрэлдэхүүнд нь олон улсын болон орон нутгийн шүүх, прокурорууд орсон аж.
Пол Пот тэргүүтэй улаан кхмерүүд засгийн эрхэнд байх үед хотын хүн амын 25, хөдөөний 15 хувь буюу хоёр сая орчим хүнийг хөнөөсөн. 1979 оны нэгдүгээр сард Пол Потын дэглэмийг түлхэн унагаасан бөгөөд дарангуйлагч ширэнгэ ойд бүгж, 1998 онд хорт хавдраар үхжээ.
С.Баяр